Вториот судски форум за родовата рамноправност и Западниот Балкан, организиран од AIRE центарот со поддршка од Владата на Обединетото Кралство, има за цел да се осврне на прашањето како судството може да се справи со различните видови родова нерамноправност во Западниот Балкан. Овој настан е од високо ниво и тој ќе ги собере клучните судски чинители од регионот и пошироко, вклучувајќи претставници од Европскиот суд за човекови права, претставници од важни регионални судски и други државни институции, универзитетски професори и невладини организации.

Една од главните теми на овогодинешниот форум ќе биде делотворен судски одговор на случаите на фемицид и други случаи на родово-базирано насилство во регионот, со оглед на тоа што судиите и другите експерти ќе разговараат за најдобрите практики во врска со истрагата, гонењето и казнувањето на овие дела. Понатаму, Форумот ќе пружи можност да се истражат и националните правни рамки, како и меѓународните стандарди за родова рамноправност, така како што се изложени во главните правни документи, како што се Европската конвенција за човекови права, Конвенцијата на Обединетите нации за елиминација на сите облици на дискриминација врз жените и Конвенцијата на Советот на Европа за спречување и борба против насилство врз жените и семејното насилство.

“Општествено наметнатите родови норми се цврсто испреплетени со секоја нишка од јавниот и приватниот живот на жените во Западниот Балкан. Родово-базирано насилство, нееднаков пристап до образование, дискриминација на работното место, мало политичко учество и нееднаквост во поседувањето сопственост се само некои од штетните симптоми и последици од длабоко вкоренетата нееднаквост со која се соочуваат жените од овој регион во нивниот секојдневен живот. Западниот Балкан навистина направи клучни почетни чекори во решавањето на овие прашања, со усвојување меѓународни договори и домашни законски рамки кои забрануваат родова дискриминација и насилство, но недостасува делотворна примена, а улогата на судството е клучна во овој поглед“, рече Biljana Braithwaite [Билјана Брејтвејт], програмска директорка на AIRE центарот за Западниот Балкан.

Горди сме што можеме да објавиме дека оваа година главни говорници ќе бидат Síofra O’Leary [Сиофра О’Лири], претседателка на Европскиот суд за човекови права и Alicia Herbert, ОBE [Алиша Херберт, носителка на Редот на Британската империја], Служба за странскиот Комонвелт и развој (FCDO) на Обединетото Кралство каде што е директорка за образование, род и рамноправност и е специјална пратеничка на Обединетото Кралство за родова рамноправност. Составивме привлечна програма која опфаќа низа панели, презентации и дискусии. Целосната агенда можете да ја најдете подолу.